قلبى ياصغير

قلبى يا صغير مالك متحير

سيبها على ربك بكره جَاى أَجمل

عارفه إنك بتحلم و نفسك بُكره تِفرَح

عارفه إنك مِستنى بَسمة تِحلى عُمرك

الأيام بِتجرى وياريتها طب تِـهَـدى

عايزة أعرف طريقى عايزة أختار بنفسى

هاتقلى إنك تعبت هاتقلى إنك زهقت

هاقلك الأمل مالى روحى وعقلى

هاقلك إن رَبى حبه بيجرى فى دَمى

هاقلك إن عمرى حابب يحلم ببكره

ردى عليك بسيط الدنيا مش نهاية

دى الجنة هيه حلمك وربنا المجيب

عيش الدنيا ببساطة مش مِستاهلة الحكاية

إفتح قلبك لربك إدعيله إنه يساعدك

قرب أكتر وأكتر ده العمر مش مَـدِيـد

هاتلاقى الفرحة جاتلك هاتلاقى الخير نَادَاك

ربك أصله رحيم عَادل سَميع مُجيب

قادر يُجبر بِخاطرك عَايزك تِقول آمين

ياله بسرعة ياقلبى دى الفرحة جانب بَـابَـك

إفتح قوام لِرَبـك إخشع تِلقى السعادة

من بكره أنا هامسك قلمى

من بكره أنا هامسك قلمى

بكره حلمى هايبدأ يكبر بكره الفرحة هاتحضن قلبى أصلى رايحة على مدرستى

واخده معايا كل حاجاتى برايتى اللى هاتبريلى قلمى أستيكتي اللى هاتمسح غلطى

وآدى مسطرتى اللى هاسطر بيها طريقى وآدى مقلمتى اللى هاتحضن كل حاجاتى

ماما كويتلى كمان مريلتى بابا عطانى فلوس مصروفي جدو قالى ربى يصونك

من بكره أنا هامسك قلمى

راح أخليه سنه رقيق علشان يبدا يرسم حلمى

وهاخليه صلب حديد للى يفكر يأذى بلدى

وهاخلي كلامه نار تكوى اللى يخوني أو يخدعنى

ربى ياربى حقق حلمى خلينى بسمة تفرح أهلى خلينى مصدر فخر لوطنى

إحفظ قلبى طهر روحى خلى حبك هوه هدفى

إحفظ ماما و بابا و جدو إحميلى حلمى ساعدنى فى ألمى

من بكره أنا هامسك قلمى

غلطش أنا ؟

كتكوتى لسه نونو

لونه أصفر حلمه يكبر

عايز يلعب حابب يعشق

واخد راحته مانا دلعته

سر شقاوته حبى فيه

دمه خفيف مصايبه كتير

حابب يعرف غاوى يبحث

حاسب منه يتعلم فيك

قالى فى مره عايز أتعرف على كتكوته

قلتله لسه بدرى عليك

قالى طيب وأنا مارتحتش

ربك يستر أصله عنيد

فجاءة فى يوم قالى عايزك

قلتله عينى قالى ها فاجأك

لقيته أخدنى بسرعة سحبنى

فتح الباب .... ها إيه رأيك

دى كتكوتى ناعمة وحلوه

سكر بودرة فى جمالها مافيش

قلت أجيبها تتعرف بيكى

مانا قلتلك لسه بدرى

إنتى قلتى بدرى عليه أصلى صغير

وأنا ماطلبتش إنى أعرفها

أنا قلتلها إنك عايزة تحكى معاها وأهوه مايضرش

إنتى قلتى بدرى عليه لكن إنتى إيه المانع

و أهو لما أكبر راح أخليكى تعرفينى بيها

ها إيه رأيك

غلطش أنا

بحبك قوى

بحبك مع إنك مش ملاك

بحبك لما بحكيلك عن كل مشاكلى وتساعدنى فى حلها مهما كانت

بحبك لما بحكيلك عن مشاعرى وكل اللى بحس بيه و بتقدر تستوعبنى وتنصحنى

بحبك لما تيجى تحكيلى عن مشاكلك ومشاعرك وتشاركنى فيها وأحس إنى حته منك

بحبك فى طيبتك اللى مالهاش مثيل

بحبك فى حنيتك اللى بتخلى كل اللى حوليك يحبوك قوى

بحبك لما بتستحمل عصبيتى و غلطى معاك وبتحاول تعرف مالى

بحبك لما نخطط مع بعض لأى شىء عايزين نعمله وبابا مش موافق عليه

بحبك لما أستناك بالليل وترجع نفضل نرغى مع بعض لحد ما الفجر يطلع من غير ما نشبع من بعض

بحبك حتى مع أخطائك و تصرفاتك اللى كتير بتبقى هاتجننى

بحبك برغم إختلافى معاك ساعات كتير

بحبك زى ماأنت بعيوبك وبمميزاتك

بحبك قوى يا أحمد ووحشتنى قوى قوى قوى

خد بالك من نفسك ومن مروة ومريم

وإرمى حمولك على ربنا

وقول دايما يارب

<أهدى هذه الكلمات إلى أحمد أخى>

{إذا أردت أن تظل فى قلوب الآخرين مهما كانت أخطائك إجعل الطيبة سلوكك و الحنان ميزتك و التسامح مبدئك}

عذرا فأنا عندي أزمة ثقة

لا أعلم هل الخطأ فينا أم فى من حولنا

ولكن غالبا حتى وإن كان يوجد خطأ فى من حولي فالخطأ الأكبر عندي
فأنا عندي أزمة ثقة لا أعلم من أين أتت ولا أستطيع السيطرة عليها
فكيف أثق فى غيرى وأنا لا أعرفه حتى وإن تحادثنا حتى وإن ضحكنا
فأنا لا أعرفه فهناك مقولة صحيحة مئة بالمئة تقول {هل تعرف فلان فتقول نعم , هل عاشرته فتقول لا , إذا أنت لا تعرفه}
لقد أصبح الكذب والنفاق صفة من صفات هذا العصر
أشاهد كثيرا من البشر أفعالهم ليست مثل قولهم
والمشكلة أنهم ليسوا قلة بل كثيرين
فما أسهل من أن تستمع إلى غيرك فتظن أنه ملاكا فحديثه يتفق مع أفكارك و ما تحب ثم ما أن تسمع عن أفعاله حتى تصدم
فأفعاله تنفى كلامه تماما
هل يستطيع أحد أنا يفسر لى ذلك ! لماذا نتحدث بكلام متحضر عاقل إسلامي بينما أفعالنا لا يوجد بها أي تحضر أو عقلانية أو إرضاء لله؟
لا أعلم هل يجب أن أثق بالآخر بعد كل هذا وأنى مخطئة فى عدم ثقتى هذه ؟
أم أنى على حق ؟
{لا تطلب منى أن أثق بك فأنا لا أعرفك ........ عذرا فأنا عندي أزمة ثقة }

يتبع

لحظة عقل

لحظة عقل بتخلينا نشوف اللى عايزين نهرب منه بتخلينا ننصف اللى خليناهم السبب فى آلامنا ورمينا عليهم كل جراحنا و همومنا وقلنا إن هما السبب فى الدوامة اللى إحنا فيها ونسينا إن إحنا كمان إخترنا نفس الطريق معاهم

مع إننا ممكن نبقى عارفين من الأول إن الطريق مالهوش نهاية غير الألم ومع ذلك مشينا فيه علشان شوفنا فى أوله لحظة سعادة فرحنا بأوله وإتناسينا آخره يمكن لإن السعادة وحشتنا أوى ومش عارفين نروح لها إزاى أو يمكن لأننا بيبقى كلنا أمل و بنحلم إن نهايته تتغير أو يمكن بناخد منها زاد نقدر نهرب بيه من قسوة الواقع شوية حتى ولو للحظات

بس مش عارفه هل المفروض فعلا لما نشوف لحظة سعادة نجرى عليها ونخطفها واللى يكون يكون ولا............................

بس لأ لحظة العقل بتقول خليك حذر ماتخليش حنينك للسعادة وإشتياقك ليها يخدعك ويخدك فى طريق مش عارفين آخره أو عارفين وبنخدر نفسنا . خلى دايما فيه حدود علشان لو السعادة دى طلعت فعلا مش دايمة وطلعت مجرد لحظة تبقى ذكرى لما تفتكرها تضحك . آه ساعات ممكن تخليك تبكى بس كمان بتخليك تضحك بدل ماتبقى حبل لفيته حولين رقبتك وربطه بإحكام لدرجة إنك مش قادر تفكه ويفضل يخنقك لحد مايقتلك يإما تفضل متعلق فيه طول عمرك

يمكن دالوقتى السؤال هوه إزاى أقدر أحقق المعادلة دي

مالهاش غير حل واحد إننا دايما نخلى ربنا فى قلوبنا ودايما نقول كلمة السر اللى هاتوصلنا للسعادة .... يارب

و أوعى تبعد عنها أو تيأس منها دى هيه اللى هاتفضل أمانك مهما كان الخوف والآلام أسرينك

يارب

يمكن

يمكن حاجات كتيريمكن هما كمان مظلومين

يمكن هما كمان تعبانين

يمكن الظلام جامد لدرجة إن مابقناش شايفين بعض

يمكن صوت الآهات اللى جوانا عالية لدرجة خلتنا مش سامعين بعض

يمكن بعدنا عن الطريق اللى بنتمناه لنفسنا

يمكن نكون توهنا ومش عارفين نرجع

يمكن نكون عارفين الطريق بس مش قادرين نمشى

يمكن نكون قادرين نمشى بس مش عايزين نمشى لوحدنا

يمكن نكون عايزين ونيس نرجع معاه

يمكن أصلا نكون مش عارفين إحنا عايزين إيه

بس الأكيد إن أيا كان اللى جوانا وأيا كان اللى عايزينه عمره ماهيريحنا و لا هايسعدنا تحقيقه إلا لو كان هوه راضى عنا

محتاجنلك قوى تعبنا وتهنا

يارب